အကာအကွယ်မပါဘဲ လွှဖြတ်ခြင်း၊ ရွေပေါ်ထိုးခြင်းက အသက်ရှူလမ်းကြောင်းနှင့် မျက်စိရောဂါများ ဖြစ်ပွားနိုင်

ရှင်းရှင်း၊ရန်ကုန်၊ ဇူလိုင်-၁၉၊အတွဲ (၁၃)၊ အမှတ်(၂၀)။

လက်သမားများ အကာအကွယ်မပါဘဲ လွှဖြတ်ခြင်း၊ ရွေပေါ်ထိုးခြင်းများ ပြုလုပ်ပါက အသက်ရှူ လမ်းကြောင်းမှတစ်ဆင့် ရောဂါများဝင်ရောက်ခြင်းနှင့်မျက်စိရောဂါများဖြစ်ပွားနိုင်ကြောင်း ဆရာဝန်ကြီးအချို့က သတိပေးပြောကြားသည်။

‘‘အကာအကွယ် ဘာမှမပါဘဲလုပ်ရင်တော့ အသက်ရှူလမ်းကြောင်းကတစ်ဆင့်အမှုန်တွေဝင်ပြီး အဆုတ်နဲ့ပတ်သက်တဲ့ရောဂါတွေရလာနိုင်တယ်’’ဟု မြန်မာနိုင်ငံဆရာဝန်အသင်း ဆေးရုံအုပ်ချုပ်မှုပညာအဖွဲ့ ဒုဥက္ကဋ္ဌအငြိမ်းစားဆေးရုံအုပ်ကြီး ဒေါက်တာဘရွှေကပြောသည်။

ယင်းရောဂါများမှာ အသက်မပြည့်သေးဘဲ အလုပ်ခွင်ဝင်ရောက်နေသည့် ကလေးငယ်များနှင့် ရောဂါ အခံရှိသူများတွင် အလွယ်တကူဖြစ်ပွားနိုင်ပြီး၎င်းတို့တွင် လုံလောက်သော ကိုယ်ခံအားမရှိခြင်းကြောင့်
ရောဂါဖြစ်ပွားလွယ်ခြင်းဖြစ်ကြောင်း ၎င်းကရှင်းပြသည်။

ထို့ပြင် ပရိဘောဂပြုလုပ်ရာတွင် အသုံးပြုသည့် ပေါလစ်ဆေးများကိုလည်းမျက်နှာဖုံးစွပ်တပ်ဆင်၍ ကာကွယ်ထားခြင်းမရှိပါက လေကောင်းလေသန့်မရရှိနိုင်သည့်အတွက် လေထုအတွင်း ဘက်တီးရီး ယားပိုးပျံ့နှံ့နိုင်ကာယင်းအနံ့ကိုရှူရှိုက်ခြင်းဖြင့် အဆုတ်ကိုထိခိုက်စေနိုင်သည့်အန္တရာယ်ရှိနိုင်ကြောင်း သိရသည်။

ရောဂါ၏ ရှေ့ပြေးလက္ခဏာများအနေဖြင့် ချောင်းဆိုးခြင်း၊ ပင်ပန်းလွယ်ခြင်း၊ အလွယ်တကူ မောနေ တတ်ခြင်းတို့ဖြစ်တတ်ပြီး အဆုတ်ထဲသို့လေကောင်းကောင်းဝင်ရောက်နိုင်ခြင်းမရှိ၍ ယင်းလက္ခဏာ များ ပြလာနိုင်ကာအဆုတ်ပွရောဂါ ဖြစ်ပွားနိုင်သည်ဟု ဆရာဝန်အချို့ကဆိုသည်။

‘အဓိကကတော့ မျက်နှာဖုံးစွပ်တပ်ပြီး အလုပ်လုပ်သင့်တယ်။ ဒါ့အပြင်အမှုန်တွေက လက်ကိုစူးတာတွေ လည်း ဖြစ်နိုင်တဲ့အတွက် တံတောင်ဆစ်ထိဖုံးတဲ့လက်စွပ်တွေဝတ်ပြီး အလုပ်ခွင်ဝင်သင့်တယ်’’ ဟု ဒေါက်တာဘရွှေကသတိပေးပြောကြားသည်။

ရန်ကုန်မျက်စိဆေးရုံကြီးမှ ပါမောက္ခဒေါက်တာတင်ဝင်းက ‘‘ဆေးရုံကိုလာတဲ့လူနာတွေထဲမှာ ကုန်ထုတ် လုပ်ငန်းလုပ်ကိုင်တဲ့သူတွေ မျက်ကြည်နာဖြစ်ပြီးအများဆုံးလာကြတယ်။ အသက်နှစ်ဆယ်၊ လေး ဆယ်ကြား အရွယ်တွေ တော်တော်များတယ်။မျက်ကြည်နာဖြစ်တဲ့ အဓိကအကြောင်းရင်းက သံမှုန်၊ ဖုန်မှုန် စတဲ့အမှုန်တွေမျက်စိထဲဝင်လို့ဖြစ်ရတာ’’ဟု ဆေးရုံရောက် လူနာများအကြောင်း ပြောပြခဲ့သည်။

source.....http://www.7daydaily.com